Стихотворения о животных

 

 

«Куран вой» Микуль Шульгин

 

Пасты курпи куран вой

Ал щи наврылыйл.

Кен ёшпи ёшан вой
Ал щи нёхамтыйл.
Машья юхпи ёхан унтан
Ал щи вущумтыйл.
Войл пила, ванта, утан
Ал туп омсыийл.
Лув шавийл шенк ун тащ,
Там ампием волан мащ.
Курал хоща хорам оль,
Нёхамта, нёхамта, сора Понь.
Навра, навра, хорам Понь.
Вотам тушпи пирщ ястас,
Амп нялмие – сот мир яснат.

( Понь – щит амп нэм)

 

Ястаты:

1.    Муйсыр щит куран вой элты там стихотворенияйн автор потарл? Хоты нын нумаслаты?

2.    Шульгин Микуль муй ханшас там вой элты? Муй хорпи куран вой? Щи яснат уйтаты па лунталн, нох ханшалн. Муя щиты аялла?

 

 

      «Ампие» Дарья Озелова

 

Асем лутам мойлапса-

Тась шавиты ай амп.

Хот лыпия лоналса

Ошан лыпи ай амп.

 

Калася лув евармас,

Хот ова лув олас,

Веськат хоят ант порал,

тасьл-ушал шавиял.

 

Хоят хорпи лув ошан-

Унал туп ант таял.

Ма ампием мет апран-

Ухал талты таксар.

 

Вой велты лув мет саман-

Ас шоппи лув усял.

Атом хоят пела ликан,

Ёх няврэма-пил ху.

 

 

 

 

 

"Ай пешие"  Юрий Вэлла

Ай пешие, ай пешие,

Ма нямак пунан поталыем,

Ёнтты умащ нан пилэнан.

Па вощхиты нан пешиен.

Шойтыен, онтылан, пунылан.

 

Нялмиен лурал калтиинк элты,

Ёшпат элты лапатлэм,

 Омлэп нови йинкан

Веншен па лехитлэм.

 

Ат шуныйл, хатлыев,

Вотыенан ат вотлайн,

Унт эпалн ат тулайн,

Пун ханшилан нямлаклайт.

 

Ястаты:

1.Нын щиранн мосман тайла ай пешие, муй антом? Уйталн щи яснат.

2.Муй уранн щимащ хораман яснатан айлла пешие?